Сурхондарёда ЙПХ ходимини ҳақоратлаб, унинг қариндошларига туҳмат қилган ҳайдовчи қўлга олинди
Фуқаро ўз қилмишидан пушаймон эканини айтиб, ходимнинг оила аъзоларидан узр сўраган.
Сурхондарё вилоятининг Денов туманида ЙПХ инспекторини ҳақорат қилиб, буни ижтимоий тармоқлар орқали тарқатган фуқаро қўлга олинди. Мазкур ҳолат юзасидан вилоят ИИБ ЙҲXБ расмий муносабат бирдирди.
Маълум қилинишича, воқеа жорий йилнинг 6 июнь куни М-41 халқаро автомобиль йўлининг Сурхондарё вилояти Денов тумани Лочин маҳалласи ҳудудидан ўтган қисмида содир бўлган. Нексия ҳайдовчиси Н. мазкур йўналишда Кобальт русумли автомашинада хизмат олиб бораётган ходим Ж. ни ҳар хил уятли сўзлар билан ҳақорат қилиб, унинг яқин қариндошлари номига туҳмат қилган ва ҳолатни ўзининг мобил телефони орқали тасвирга олиб, ижтимой тармоқларга тарқатган. Шундан сўнг у ИИБ органларидан яширинган.
Сурхондарё вилояти ИИБ ЖХХ ЙҲХБ ва Денов тумани ИИБ ходимлари томонидан олиб борилган тезкор қидирув натижасида ҳайдовчи Денов тумани ҳудудида ушланган.
“Нимагадир каллам ўзимда эмас эди. Ичганим йўқ, чекканим йўқ. Ўзим билмаган ҳолда видеони ижтимоий тармоққа тарқатдим”, — дейди ҳайдовчи.
Дастлабки терговга қадар текширув ҳаракатлари олиб борилганда, фуқаро муқаддам суд томонидан Жиноят кодексининг 122-моддаси билан айбли деб топилиб, вояга етмаган фарзандларини моддий таъминлашдан бўйин товлаб, ижро органларидан яшириниб юргани аниқланган.
Навбатдаги ҳаракатида Жиноят кодексининг 140-моддаси 3-қисмида назарда тутилган ҳолатлар (ички ишлар органи ходимига нисбатан қўпол муносабатда бўлгани, шаъни ва қадр-қимматини беодоблик билан қасддан таҳқирлаш, ОАВда, телекоммуникация тармоқларида ёки интернет жаҳон ахборот тармоғида жойлаштириш орқали ҳақорат қилиш) борлиги аниқланиб, келгусида қонуний тўхтамга келиш учун Денов тумани прокуратурасига тақдим этилган.
