Жиззахнинг Зомин туманида кучли сел кузатилди
Оқибатда аҳоли уйлари ва экин майдонларини сув босган.
Жиззах вилояти Зомин туманининг “Дуоба” ҚФЙ ҳудудида 11 июнь куни қисқа муддатли кучли ёғингарчилик оқибатида сел оқимлари кузатилди. Бу ҳақда вилоят ФВБ матбуот хизмати хабар берди.
Қайд этилишича, “Усмонлисой”, “Сувлисой” ва “Саркамар” қишлоқларидан ўтган ариқ сувлари тошиб, ёндош ҳудудда жойлашган айрим аҳоли яшаш уйларининг ҳовлисига, экин майдонларига сув кирган.
Мазкур вазият бўйича зудлик билан Жиззах вилояти Фавқулодда вазиятлар бошқармаси раҳбарияти ва қутқарув бўлинмалари ҳодиса жойига етиб борган. Ҳозирда қутқарувчилар томонидан сув оқимларини хавфсиз ўтказиб юборилишини таъминлаш бўйича барча зарур чора-тадбирлар кўрилмоқда.
“Вазият тўлиқ назорат остига олинган. Ҳодиса оқибатида жабрланганлар йўқ”, — дейилади хабарда.
