Америка компанияси “Роскосмос”га тўловни рублда амалга оширди
Бунга тўловнинг кечиктирилиши сабаб бўлган.
“Роскосмос” Американинг “Axiom Space” компаниясидан “NASA” астронавти Марк Ванде Хейнинг Россиянинг “Союз” космик кемасида парвози учун рублда тўлов олди. Бу ҳақда давлат корпорацияси раҳбари Дмитрий Рогозин маълум қилди.
“Биз тўлиқ маблағни “NASA”дан эмас, аниқроғи, ушбу миссияни ташкил этишда воситачи бўлган “Axiom”дан олдик”, — деди Рогозин.
Унинг сўзларига кўра, Америка компанияси тўловни бир ойга кечиктирган. 14 апрель куни Рогозин Американинг “Axiom Space” компанияси логистика муаммолари туфайли “NASA” астронавти Ван Де Хейнинг парвози учун “Роскосмос”га тўловни ўтказа олмагани ҳақида хабар берганди.
23 март куни Рогозин давлат корпорацияси халқаро шартномаларни рублда тузишни режалаштираётганини эълон қилган.
