Фарғонада ақидапарастликни тарғиб қилган шахслар ушланди
Улардан бири Ўзбекистон Республикаси давлат тузумини конституцияга хилоф тарзда ўзгартиришга қаратилган материалларни тарқатиб келган.
Фарғона вилоятида ижтимоий тармоқлар орқали ақидапарастлик ғояларини тарғиб қилиб келган шахслар ушлади. Бу ҳақда “Янги Ўзбекистон” нашри хабар берди.
Маълум қилинишича, Қўқон шаҳрида яшовчи, 2001 йилда туғилган М. О. ўзининг “Samsung Galaxy A31” телефони орқали Телеграм мессенжерида аккаунт очиб, Ўзбекистон Республикаси давлат тузумини конституцияга хилоф тарзда ўзгартиришга қаратилган, ақидапарастлик ғоялари билан йўғрилган ҳамда “Ўзбекистон ислом ҳаракати” террористик ташкилотига тегишли бўлган диний материалларни яқин алоқаларига тарқатиб келган.
Фарғона шаҳрида яшовчи, 2000 йилда туғилган Қ. Б. эса Интаграм ижтимоий тармоғидаги ўз профилига ақидапарастлик ғояларини тарғиб қилувчи видеолар, маърузалар ва жиҳод қилиш ҳақидаги овозли матнларни жойлаб, ўзининг виртуал обуначиларига тарғиб қилиб келган.
Таъкидланишича, иккала ҳолат юзасидан Вазирлар Маҳкамаси ҳузуридаги Дин ишлари бўйича қўмита берган хулосаларга кўра, ушбу шахслардан олинган материалларни Ўзбекистон Республикаси ҳудудига олиб кириш, тайёрлаш ва тарқатиш тақиқланади.
