Сурхондарёда фуқаролар МИБ ходимларини тошбўрон қилди
Шундан сўнг 4 киши ИИБ ходимлари томонидан олиб кетилган.
Ижтимоий тармоқларда Сурхондарё вилояти Шўрчи туманида бир неча фуқаролар ИИБ ходимлари томонидан олиб кетилаётгани акс этган видеолавҳа тарқалди. Ҳолат юзасидан вилоят ИИБ ахборот хизмати расмий маълумот берди.
Маълум қилинишича, фуқаролик ишлари бўйича Денов туманлараро судининг 2022 йил 2-феврал кунги “Ноқонуний қурилишларни мажбурий тартибда буздириш” ҳамда “Нотурар ер майдонидан чиқариш ҳақида”ги суд қарори ҳамда МИБ Олтинсой тумани бўлимининг ижро ҳужжатига асосан, жорий йилнинг 8-июн куни соат 10:00 га мажбурий ижро ҳаракатлари тайинланган. Тегишли ташкилот ходимлари белгиланган жойга боришганида жавобгарлар уларга тўсқинлик қилиб, ижро ҳаракатларига фаол қаршилик кўрсатган ва маъсулларга тош ва ғишт бўлакларини отишган.
Оқибатда жамоат тартибини бузиб, давлат органлари ходимларига тан жароҳати етказган тўрт нафар фуқаро мажбурий тарзда туман ИИБга олиб борилиб, уларга нисбатан тегишли ҳужжатлар расмийлаштирилган.
Ҳолат юзасидан ўрнатилган тартибда текширув ишлари ўтказилмоқда.
