Францияда парламент сайловида рекорд даражада кам сайловчи қатнашди
Сайловнинг иккинчи босқичи 19 июнда бўлиб ўтади.
Якшанба куни Францияда парламент сайловларининг биринчи босқичи бўлиб ўтди.
Мамлакат ички ишлар вазирлиги маълумотларига кўра, маҳаллий вақт билан соат 17:00 да сайловчиларнинг 39.42 фоизи овоз берган. Бу 2017 йилги парламент сайловларининг биринчи босқичига нисбатан паст кўрсаткич (ўшанда 40.75 фоиз кўрсаткич қайд этилган).
Францияда жами 48.7 миллион фуқаро овоз бериш ҳуқуқига эга. Улар Миллий мажлис (парламентнинг қуйи палатаси) 577 депутатини сайлаши керак.
Биринчи босқичда ғалаба қозониш учун сайловчиларнинг 50 фоиздан ортиғини олиши талаб этилади. Иккинчи турда 12.5 фоиздан баланд овоз тўплаган номзодлар иштирок эта олади. У 19 июнь куни ўтказилади.
Ҳозирда икки альянс алоҳида ажралиб турибди. Улардан бири — Жан-Люк Меланшон бошчилигидаги “Бўйсунмас Франция” ўта сўл партияси бошчилигидаги коалиция ҳисобланиб, у Яшиллар, Социалистик ва Коммунистик партия билан “Янги халқ экологик ва социал иттифоқи деб аталади. У парламентда кўпчиликни эгаллашга ҳаракат қилмоқда, бу Меланшонга бош вазир лавозимини эгаллашга имкон беради.
