Жанубий Корея, АҚШ ва Япония ҳарбийлари ҳарбий машғулотларни кескин кўпайтирмоқчи
КХДР ракета синовлари бунга сабаб бўлган.
Жанубий Корея, АҚШ ва Япония ҳарбийлари Гавайи оролларида ҳарбий машғулот ўтказмоқчи. Бу ҳақда Yonhap агентлиги хабар берди.
Унга кўра, Pacific Dragon машғулотлари 1-14 август кунлари ўтказилиши белгиланган. Вашингтон, Сеул ва Токио КХДР ракета синовлари фонида хавфсизлик соҳасидаги ҳамкорликни кучайтирмоқчи.
Ўтган ҳафтада уч давлат мудофаа вазирлари Сингапурда учрашган ҳамда ҳарбий машғулотларни доимий равишда ўтказиб боришга келишиб олган. Бундан ташқари, бу йилги ўқув машқларида Канада ва Австралия ҳам иштирок этиши мумкин.
Йилнинг иккинчи ярмида Жанубий Корея, АҚШ ва Япония ракета учирилишидан огоҳлантирувчи тизимларни ҳам синовдан ўтказади. Шунингдек, 29 июндан 4 августгача уч давлат ҳарбий кемалари RIMPAC (Rim of the Pacific — Тинч океани доираси) машғулотларини ўтказади.
Аввалроқ Жанубий Корея президенти Юн Сок Ёль КХДРга қатъий жавоб беришга тайёрлигини айтганди.
