Асосий мақсад шаҳар аҳолисини кўпайтириш эмас, уларни яшаш учун қулай ҳудудга айлантириш — Жаҳон Банки эксперти

 

Урбанизация — иқтисодий тараққиётнинг асоси. Дунёнинг ривожланган давлатларда аҳолининг катта қисми шаҳарларда яшайди. Шаҳарлар илм-фан, маданият ва иқтисодий фаолликнинг маркази бўлиб қолмоқда.

 

Ўзбекистонда ҳам бу йўналишда кенг қамровли ишлар бошлаб юборилган. Хусусан, 2030 йилга қадар шаҳар аҳолиси улушини 65 фоизга етказиш, замонавий, ихчам ва экологик қулай шаҳар инфратузилмасини яратиш ҳамда Республикада урбанизация жараёнларини жадаллаштиришга қаратилган концепция лойиҳасини ишлаб чиқиш мақсад қилинган.

 

Масалан, “Янги Ўзбекистон” массивлари замонавий шаҳар талабларига тўла жавоб беради. Хусусан, бу ерда аҳоли ихчам жойлашади, яшил ҳудудлар ва хизмат кўрсатиш объектлари фаолияти йўлга қўйилади. Шунингдек, Республикада “миллионер шаҳарлар” сонини кўпайтириш бўйича ишлар олиб борилмоқда. Хусусан, яқин истиқболда Самарқанд ва Наманганни шундай типдаги шаҳарларга айланади.

 

Бугун Тошкентда Жаҳон банкининг “Вақт келди: Ўзбекистон қандай қилиб урбанизациядан барқарор ривожланишнинг асосий омили сифатида фойдаланиши мумкин?” ҳисоботининг тадқиқоти бўлиб ўтди. Унда шаҳарсозликни ривожлантириш бўйича экспертлар ўзаро фикр алмашди.

 

Хусусан, юқорида қайд этилган ҳисоботнинг асосий муаллифларидан бири, Жаҳон банкининг шаҳарсозлик тараққиёти бўйича мутахассиси Дмитрий Сиваев муҳим таклифлар берди.

 

Унинг сўзларига кўра, замонавий шаҳарлар аҳоли яшаши учун қулай, ихчам ва экологик жиҳатдан барқарор бўлиши лозим. Бунга мисол сифатида Лондон шаҳри келтирилди.

 

“Масалан, мен Лондонда яшаганимда, шаҳар ташқарисидан марказгача 20 дақиқада етиб борардим. Сабаби, Лондон — яхши ишлайдиган шаҳар”, — деб қайд этди эксперт.

 

Сиваев урбанизация ва иқтисодий тараққиёт омиллари бирлашган тақдирда катта натижаларга эришиш мумкинлигини таъкидлади. Шу билан бирга Ўзбекистонда бу борада амалга оширилаётган ишларга тўхталиб ўтилди.

 

“Ўзбекистонда урбанизацияни ривожлантириш учун катта мақсадлар қўйилган. Аммо асосий мақсад — шаҳарларда аҳоли сонини кўпайтириш эмас, балки шаҳарни одамлар яшаши учун қулай ва хавфсиз ҳудудга айлантириш”, — деб таъкидлади у.

 

Мамлакатда айрим шаҳарлардаги баъзи камчиликлар ҳам қайд этилди. Масалан, Наманган шаҳри мисолида сўнгги йилларда у тўхтовсиз ўсгани, аммо янги қурилган бинолар анча тартибсиз ҳолатда барпо этилганига эътибор қаратилди.

 

“Шаҳар анча чўзилиб кетган. Шу сабабли маълум вақтдан сўнг бу ерда тирбандликлар кўпайиши мумкин”, — деди Сиваев.

 

Тадбир давомида Иқтисодий тараққиёт ва камбағалликни қисқартириш вазирлиги, эксперт жамоалари ва олимлар фикри эшитилди.