Олмалиқ шаҳрида кучли портлаш содир бўлди
Ҳолат бўйича ФВВ маълумот берди.
Бугун, 15 июнь куни Тошкент вилоятининг Олмалиқ шаҳрида жойлашган корхона биносида портлаш содир бўлди. Бу ҳақда Фавқулодда вазиятлар вазирлиги Матбуот хизмати хабар берди.
Маълум қилинишича, воқеа соат 17:55 да Олмалиқ шаҳридаги “Ammafos-Maksam” корхонаси ҳудудида ижарада фаолият юритаётган “MAXAM-UZBEKISTON” қўшма корхонасининг Реахит ишлаб чиқариш цехида юз берган. Ҳодисага технологик жараённинг бузилиши сабаб бўлган.
Дастлабки маълумотларга кўра, портлаш оқибатида ушбу цехнинг бино конструкциялари бузилган. Шунингдек, воқеа жойига яқин бўлган юк машинаси ҳайдовчиси тан жароҳати олган.
“Айни вақтда жабрланган фуқаро шаҳар тиббиёт бирлашмасида, шифокорлар назоратида, аҳволи қониқарли. Содир бўлган вазият оқибатида ишчи-ходимларнинг ҳалок бўлиш ҳолатлари қайд этилмади”— дейилади хабарда.
Воқеа жойига Фавқулодда вазиятлар вазири бошчилигида вилоят ҳокимлиги, прокуратура, ИИВ, Миллий Гвардия ва бошқа ташкилотлар вакиллари етиб борган. Ҳозирда вазият оқибатларини бартараф этиш ишлари амалга оширилмоқда.
