Андижонда умумий овқатланиш ошхонаси ёниб кетди
Ҳодиса жойига 6 та ёнғин-қутқарув экипажи жалб қилинган.
Бугун, 17 июнь куни Андижон вилоятининг Марҳамат туманида умумий овқатланиш биносида ёнғин юз берди. Бу ҳақда Фавқулодда вазиятлар вазирлиги Матбуот хизмати хабар берди.
Маълум қилинишича, соат 06:52 да Марҳамат тумани “Ўзбекистон” МФЙ Ипак йўли кўчасида жойлашган “Бешбола” умумий овқатланиш ошхонасида ёнғин содир бўлаётганлиги тўғрисида вилоят ФВБга хабар келиб тушган. Шунга кўра, 6 та ёнғин-қутқарув экипажи соат 06:56 да воқеа жойига етиб бориб, ёнғин соат 07:08 да қуршаб олинган ва соат 07:58 да тўлиқ бартараф этилган.
Ҳодиса оқибатида ҳеч ким тан жароҳати олмаган. Ошхона 3-қаватининг тахминан 250 квадрат метр майдонида бинонинг том, шифт ва ички қисми ёниб зарарланган. Ҳозирда ёнғиннинг келиб чиқиш сабаби ва моддий зарар миқдори аниқланмоқда.
Эслатиб ўтамиз, бундан олдин Андижонда икки қаватли савдо марказининг ертўласида ёнғин содир бўлгани хабар қилинганди.
