Ўзбекистонда сариқ рангли тарвуз етиштирилмоқда
Янги нав қизил тарвузга қараганда тезроқ пишади ва уруғи бўлмайди.
Тошкент вилоятининг Оҳангарон туманидаги “Имронбек Шаҳруза МЧЖ" фермер хожалигида уруғи Жанубий Кореядан келтирилган “Riamo” навли сариқ тарвуз етиштирилмоқда. Бу ҳақда “Агро информ” нашри хабар берди.
Қайд этилишича, 2015 йилда ташкил этилган ушбу хўжаликнинг умумий экин майдони 86 гектар бўлиб, шундан уч ярим гектарида сариқ (икки йилдан бери ҳосил олинмоқда) ва қизил тарвуз экилган.
Сариқ тарвуз чет эллик селеционер олимлар томонидан ёввойи ва маданий тарвузни чатиштириш орқали олинган гибрид ҳисобланади. Илк ҳосил Ўртаер денгизи мамлакатларидан олинган бўлса, бугун бутун дунё бўйича етиштирилмоқда. Ташқи коринишдан сариқ тарвузлар овалсимон ёки думалоқ бўлади. Пўсти яшил, силлиқ ёки йўл-йўл рангда. Сабзавотнинг ичи сариқ рангда ҳамда вазни ўртача 1,5 килограмдан 4-5 килограмгача бўлади.
Сариқ тарвузнинг уруғлари камроқ ёки умуман бўлмайди. Таъми манго, лимон ва ананасга ўхшаб кетади. Сариқ тарвуз навлари қизилга қараганда сал олдинроқ пишади, яъни тезпишар саналади.
Сариқ тарвуз таркибида A, B1, B2, B5, B6, B9, E, C, PP витаминлари бор. Шунингдек, калций, калий, магний, темир, натрий, фосфор моддаларига сероб. У иммун тизимига ижобий таъсир қилади, турли инфекция, вирусларга қарши курашишда ёрдам беради. Энг муҳими, сариқ тарвуз парҳезда бўлган, аллергияси бор одамлар учун фойдали.
