Европада қишга ғамлаб қўйилган газдан фойдаланиш бошланди
2023 йил январида ЕИ бутунлай ёқилғисиз қолиши мумкин.
Европа қишки заҳира газларидан фойдаланишни бошлади. Бу ҳақда Bloomberg агентлиги хабар берди.
Бунга асосий сабаб Россиядан етказиб бериш ҳажмининг камайиши бўлган. хусусан, Франция, Италия, Австрия ва Германияга газ етказиш қисқарган. Бу “Газпром”нинг Siemens газ қувурида таъмирлаш ишлари сабаб газ етказиб беришни тўхтатгани билан боғлиқ.
Апрел ўрталаридан буён Европа ерости газ омборларида заҳиралар камайган. Сўнгги маълумотларга кўра, улар 1 фоизга пасайган. Одатда ёз мавсумида ушбу омборлар тўлдирилади ва қишнинг ўртасига қадар сақланади.
Wood Mackenzie Ltd. Компаниясининг пессимистик прогнозларига кўра, “Шимолий оқим” газ қувури бутунлай тўхтатилган тақдирда Европада иситиш мавсуми бошланишига қадар ЕИ белгилаган даражадан кам газ заҳиралари қолади. Бундай шароитда январда ёқилғи бутунлай тугайди.
Аввалроқ "Saudi Aramco" компанияси раҳбари энергетика танқислигининг олдини олиш учун нефть-газ тармоғига инвестиция киритишни таклиф қилганди.
