«Евронигоҳ-2023» танловини қаерда ўтказиш баҳсли мавзуга айланди
“Танловни Британияда эмас, Украинада ўтказиш керак” – Борис Жонсон.
Буюк Британия бош вазири Борис Жонсон «Евронигоҳ-2023» қўшиқ танловини Украинада ўтказишга чақирди. Бу ҳақда "Sky news" хабар берди.
"Бизда ажойиб рақам борлигини, иккинчи ўринни эгаллаганимизни биламан ва танлов бизнинг мамлакатимизда бўлишини истардим. Лекин ҳақиқат шуки, Украина вакиллари ғалаба қозонишди ва улар буни ўтказишга лойиқ", – деди Жонсон Киевдан қайтгач.
Украиналиклар бу йилги танловда ғалаба қозонишди. Қоидага кўра ғолиб келаси йилги мусобоқада мезбонлик қилиш ҳуқуқини қўлга киритади.
Аввалроқ ташкилотчилар 17 июнь куни 2023 йилги «Евронигоҳ» қўшиқ танловини нотинч вазият туфайли Украинада ўтказиб бўлмаслигини, шу боис уларнинг вакиллари бу йил иккинчи ўринни эгаллагани учун Буюк Британияга мурожаат қилганини билдирган эди.
Украина Маданият ва ахборот сиёсати вазири Олександр Ткаченко қарорга эътироз билдирмоқчи эканлигини айтди.
