Самарқандда яна савдо дўкони ёниб кетди
Ҳодисага электр симларининг қисқа туташуви сабаб бўлган, деб тахмин қилинмоқда.
Бугун, 20 июнь куни Самарқанд шаҳрида фуқарога тегишли савдо дўкони ва омборхонада ёнғин юз берди. Бу ҳақда вилоят Фавқулодда вазиятлар бошқармаси Матбуот хизмати хабар берди.
Қайд этилишича, бугун соат 19:25 да Самарқанд шаҳри “Боғисарой” МФЙ Спитамин шоҳкўчаси 68-уйда жойлашган “Саидабегим” оилавий корхонасига қарашли омборхона ва савдо дўконида ёнғин содир бўлаётганлиги тўғрисида вилоят ФВБ хабар келиб тушган.
Воқеа жойига ёнғин-қутқарув экипажи соат 19:28 да етиб борган ва ёнғин соат 20:35 да тўлиқ ўчирилган. Уни бартараф этишга 6 та ёнғин-қутқарув экипажи ва 2 та махсус сув ташиш техникаси жалб этилган.
Дастлабки маълумотларга кўра, омборхона ва савдо дўконининг тахминан 210 квдрат метр майдонида шифт, том қисми ва омборхона ичидаги пахта тойлари ёниб зарарланган. 350 квадрат метр майдон ёнғиндан сақлаб қолинган.
“Ҳодиса оқибатида тан жароҳати олган ва ҳалок бўлганлар йўқ. Ёнғин тахминан электр симларининг қисқа туташувидан содир бўлган”, — дейилади хабарда.
Ҳозирда ёнғиндан келтирилган моддий зарар миқдори аниқланмоқда.
Эслатиб ўтамиз, бундан олдин Самарқанд вилоятининг Оқдарё туманидаги савдо дўконларида ёнғин юз берганди. Бундан ташқари, 5-июн куни Нарпай туманидаги деҳқон бозорида ҳам йирик ёнғин содир бўлган.
