Термизда жойлашган логистика марказига халқаро хаб мақоми берилди
Ушбу марказ Афғонистонга гуманитар ёрдам етказиб бериш билан шуғулланади.
Термизда жойлашган "Termez Cargo Centre"га халқаро транспорт хаби мақоми берилди. Бу ҳақда Президентнинг “Гуманитар ёрдам кўрсатиш бўйича Халқаро кўп функцияли транспорт-логистика хабини ташкил этиш чоралари тўғрисида”ги қарорида сўз боради.
Ҳужжатда таъкидланишича, замонавий дунёнинг асосий муаммоларидан бири Афғонистон ва бошқа мамлакатлардаги гуманитар вазиятни барқарорлаштириш ҳисобланади.
Халқаро хабни ташкил этишдан кўзланган мақсад — БМТ ва бошқа халқаро ташкилотларнинг Афғонистонга кўрсатаётган гуманитар ёрдамини марказлаштирилган тарзда етказиб беришни таъминлашдан иборат.
Termez Cargo Centre инсонпарварлик кўмагини қабул қилиш, сақлаш ва жўнатиш билан шуғулланади. Етказиб бериш ҳаво, темирйўл ва автомобиль транспорти орқали амалга оширилмоқда.
Хабда комплекс транспорт-логистик хизматларни кўрсатишни ташкил этиш режалаштирмоқда.
Аввалроқ Оғир гуманитар вазият туфайли Жаҳон банки Афғонистондаги қатор лойиҳаларини қайта тиклаганди.
