Хонанда Шоҳруҳ “удлинитель” билан тақдирланган болага компьютер совға қилмоқчи
Саънаткор бу қарори қатъий эканини айтиб, болани Инстаграм орқали алоқага чиқишини сўраган.
Ижтимоий тармоқда Қорақалпоғистон Республикаси Чимбой туманида IТ-танлов ғолибига электр узатиш кабели совға қилингани ҳақида хабарлар тарқалди ва кенг муҳокамаларга сабаб бўлди. Шундан сўнг тармоқда болага ташкилотчилар томонидан компьютер берилгани акс этган суратлар пайдо бўлди.
“Уммон” гуруҳининг собиқ аъзоси Шоҳруҳ Инстаграм саҳифасида “удлинитель” билан тақдирланган болага мурожаат қилди.
Хонанда болага ўзи компьютер олиб беришини маълум қилган. Шоҳруҳ бу борада ҳазиллашмаслигини таъкидлаган. Агар йигит шу гапдан хабар топса, у билан боғланишини сўраб ёзган.
“Йиғлама ўзимнинг 'итишнигим'. Ўзим битта компьютер совға қиламан. Мен ҳазиллашмадим. Ростдан шу болага совға қиламан. Агар хабарини топса, менга алоқага чиқсин. Профилимда номер ёзилган ёки ’direct’га ёзсин”, — деган у.
