Лондон Украина темирйўллари учун 10 миллион фунт ажратди
Бу дон экспортини тезлаштириш учун амалга оширилади.
Буюк Британия Украина темирйўллари тармоғини тиклаш мақсадида 10 миллион фунт-стерлинг ажратади. Бу ҳақда Борис Жонсон канцелярияси тарқатган баёнотда сўз боради.
“Бирлашган Қироллик ва унинг ҳамкорлари Россия қамалини четлаб ўтиш бўйича режа ишлаб чиқмоқда ҳамда Украина билан темирйўлларни тиклашда биргаликда ишлайди. Озиқ-овқат инқирози ортидан бутун дунёда 47 миллион киши гуманитар ҳалокат ва очлик билан тўқнашиши мумкин”, – дейилади баёнотда.
Германияда бўлиб ўтаётган “катта еттилик” саммитида Борис Жонсон жорий вазият халқаро ҳамжамиятнинг бирлашган ҳолда ишлаши зарурлигини тақозо этаётганини таъкидлаган.
Аввалроқ Германия Украинадан барча донни олиб чиқишнинг иложи йўқлигини маълум қилганди.
