1 июлдан “тонировка” нархлари 6 баробарга арзонлаштрилади
Бу бўйича Президент қарори қабул қилинди.
Бироз аввал Президент Шавкат Мирзиёев видеоселектор йиғилишида “тонировка” масаласига тўхталиб, бу бўйича ҳайдовчилар кутган қарорни имзолагани хабар қилинганди.
Давлат раҳбари таъкидлаганидек, 1 июлдан бошлаб:
—автомобилнинг орқа ён ойналарини қорайтириш тўловлари бекор қилинади, яъни бепул бўлади;
—олд ва орқа ён ойналарни тўлиқ қорайтириш тўловлари 6 баробаргача арзонлаштирилади;
—ишлаб чиқарилганига 10 йилдан кўп бўлмаган енгил машиналарни мажбурий техник кўрикдан ўтказиш тартиби бекор бўлади.
Шунингдек, 10 йилдан 15 йилгача бўлган енгил машиналар – икки йилда, 15 йилдан ортиқ бўлганлари эса бир йилда бир марта техник кўрикдан ўтказилади.
“Бу ҳали бошланиши. Мен Президент маслаҳатчилари, Бош вазир ўринбосарлари ва вазирларга топшириқ берганман.
Одамларимизни қийнаётган, аҳамиятини йўқотган тартиб ва чекловларни бекор қилиш бўйича Ишчи гуруҳи барча йўналишларда мунтазам ишлаяпти.
Жойлардан тушган асосланган таклифлар ва ечимлар бўйича доимий тарзда халқимизнинг фойдасига хизмат қиладиган қарорлар қабул қилиб борилади”, - деди Президент йиғилиш якунида.
