Самарқандда йўл бўйидаги дўкон ёниб кетди
Оқибатда дўкон биноси ва ундаги маҳсулотларга зарар етган.
Самарқанд вилоятининг Пастдарғом туманида 27 июнь куни савдо дўконида ёнғин чиқди. Бу ҳақда вилоят Фавқулодда вазиятлар бошқармаси Матбуот хизмати хабар берди.
Қайд этилишича, соат 22:44 да Пастдарғом тумани “Янгиобод” МФЙ ҳудудидан ўтувчи 4Р-46 автомобил йўлининг 25-километрида жойлашган, якка тартибдаги тадбиркор 1989-йилда туғилган фуқаро Ш. У. га тегишли енгил конструкцияли савдо дўконида ёнғин содир бўлаётганлиги ҳақида туман ФВБга хабар келиб тушган.
Ёнғинни бартараф этишга ФВБнинг 3 та ёнғин-қутқарув экипажи жалб этилган. Улар соат 22:47 да воқеа жойига етиб бориб, 23:06 да олов қуршаб олинган ва ёнғин соат 00:11 да бартараф этилган.
Дастлабки маълумотларга кўра, омборхона ва савдо дўконининг тахминан 100 квадрат метр майдонида шифт, том қисми ва унинг ичидаги аралаш маҳсулотлари ёниб зарарланган.
Ҳодиса оқибатида тан жароҳати олган ва ҳалок бўлганлар йўқ. Ҳозирда ёнғиннинг келиб чиқиш сабаби ва зарари аниқланмоқда.
