Тошкентнинг 12 та тарихий дарвозаси эскизлари намойиш этилди—фото
Шаҳар ҳокими ўринбосари қадимий дарвозаларни қайта тиклаш бўйича йиғилиш ўтказди.
Тошкент шаҳар ҳокими ўринбосари Фахриддин Давруков раислигида Тошкентнинг 12 та тарихий дарвозаларини қайта тиклаш бўйича ишчи гуруҳининг навбатдаги йиғилиши бўлиб ўтди. Бу ҳақда шаҳар ҳокимлиги матбуот хизмати хабар бермоқда.
Учрашувнинг биринчи қисмида қадимги дарвозага шартли равишда ўхшаш замонавий иншоотни қуриш, дарвозалар ўрнидаги қурилмалар тақдири, дарвозаларни атрофдаги бинолар, йўллар, боғлар, каналлар билан оптимал тарзда бирлаштириш каби консептуал масалалар муҳокама қилинган.
Тадбирнинг иккинчи қисмида Ягона буюртмачи хизмати Инжиниринг компанияси томонидан ишлаб чиқилган лойиҳалар кўриб чиқилган. Компания таклифларини келгуси иш учун замин сифатида қабул қилишга қарор қилинган.
“Ҳар бир масала юзасидан таклифлар билдирилди, фикр-мулоҳазалар тўпланди. Ишчи гуруҳ оптимал ечим ишлаб чиқиш учун йиғилишларни давом эттиради, унинг натижалари ҳақида яна хабар берилади”, — дейилади хабарда.
Эслатиб ўтамиз, Тошкентнинг 12 та дарвозасини қайта тиклаш лойиҳаси Президентнинг “2022-2026-йилларда Янги Ўзбекистонни ривожлантириш стратегияси тўғрисида”ги Давлат дастурига мувофиқ амалга оширилмоқда.
