Вашингтон дипломатлари Венесуэлага келди
Ташриф олдиндан эълон қилинмаган.
АҚШ президентининг гаровга олинганлар бўйича махсус вакили Роджер Карстенс ва Американинг Венесуэладаги элчиси Жеймс Стори эълон қилинмаган ташриф билан Каракасга келди. Бу ҳақда Associated Press хабар берди.
Давлат департаменти маълумотларига кўра, ушбу ташриф Венесуэлада қўлга олинган АҚШ фуқароларини озод қилиш мақсадида амалга оширилган. Бундан ташқари, энергетика ресурсларига бағишланган масалалар ҳам муҳокама қилиниши мумкин.
Сўнгги вақтларда нефть нархининг кескин кўтарилиши ортидан Оқ уй ва қатор Ғарб давлатлари Венесуэла билан нефть етказиб бериш масаласида музокара ўтказиши мумкинлиги тўғрисида хабарлар тарқалди. Ушбу мамлакат нефть захиралари бўйича дунёда биринчи ўринда туради.
Венесуэла президенти Николас Мадуро ушбу ташрифни тасдиқлаган.
