Талабалар учун давлат гранти сони икки бараварга оширилади— Президент
Шунингдек, техникумлар учун таълим кредити жорий қилинади.
Аввалроқ Ўзбекистон Президенти Шавкат Мирзиёев Ёшлар кунига бағишланган байрам тадбирида иштирок этиб, нутқ сўзлагани хабар қилинганди.
Давлат раҳбари нутқи давомида Ўзбекистонда ёшлар учун амалдаги имтиёзларни 11 тадан 25 тага кўпайтирилишини таъкидлаганди. Шунингдек, Президент сўзида давом этиб, таълим соҳасига ҳам тўхталиб ўтди.
“Яна бир муҳим янгилик – мусиқа санъатига қизиқиши баланд бўлган ёшларни янада қўллаб-қувватлаш мақсадида 2022-2023 ўқув йилидан бошлаб:
—мақом хонандалиги, мақом чолғу ижрочилиги ва бахшичилик йўналишларига янги қабул қилинган талабаларнинг шартнома тўловлари тўлиқ давлат томонидан тўлаб берилади;
—фортепиано ижрочилари тайёрлаш бўйича қабулни 3 баробарга кўпайтириб, бу йўналишда ҳам контракт тўловлари тўла қоплаб берилади.
Бундан ташқари, энди техникумларга қабул йилда 2 марта ташкил этилиб, талабалар учун давлат гранти сони 2 баробарга оширилади.
Шунингдек, техникумлар учун таълим кредити жорий қилинади ва 80 мингдан зиёд ёшларга кредит бериш учун молиявий ресурс ажратилади.
Бундан буён хусусий таълим муассасаларида IT бўйича ўқиш (дастурлаш, вэб-дизайнер, анимация) истагини билдирган ёшларга ҳам 20 миллион сўмгача миқдорда 4 йиллик имтиёзли кредит тақдим этилади”, — деди Президент.
