Наманганда озиқ-овқат дўкони ёниб кетди
Оқибатда бинонинг 20 квадрат метр жойи, 10 дона музлатгич ва 2 дона совутгич ёниб зарарланган.
Бугун, 3 июль куни Наманган шаҳрида йўл четидаги озиқ-овқат дўконида ёнғин юз берди. Бу ҳақда вилоят Фавқулодда вазиятлар бошқармаси ахборот хизмати хабар берди.
Маълум қилинишича, соат 04:37 да шаҳар ФВБ 101 қисқа рақамига Якка тартибдаги тадбиркорга қарашли Наманган шахар “Шарқ тонги” МФЙ Навоий кўчасида жойлашган озиқ-овқат дўконида ёнғин содир бўлаётганлиги хақида хабар келиб тушган.
Ўт ўчирувчилар томонидан ёнғин бартараф этилган. Ҳодиса оқибатида савдо дўконининг шифт қисмидан 20 квадрат метр жойи, 10 дона музлатгичи, 2 дона совутгич (кондиционер) ҳамда савдо дўконига тегишли хужжатлар, озиқ-овқат ва ноозиқ-овқат махсулотлари ёниб зарарланган.
Хозирда содир бўлган ёнғин юзасидан терговга қадар суруштирув ишлари олиб борилмоқда.
