“Қозоғистон Ўзбекистон Республикасида содир бўлган сўнгги воқеаларни хавотир билан қабул қилди”
Қозоғистон ТИВ Қорақалпоғистондаги намойишлар юзасидан расмий баёнот берди.
Қозоғистон Республикаси Ташқи ишлар вазирлиги Қорақалпоғистонда содир бўлган сўнгги воқеалар юзасидан баёнот берди, дея хабар қилмоқда “Казинформ” нашри.
“Ўзбекистон Қозоғистон учун қардош давлат, ишончли иттифоқчи ва стратегик шерик. Шунинг учун Қозоғистон Ўзбекистон Республикасида содир бўлган сўнгги воқеаларни хавотир билан қабул қилди.
Биз Ўзбекистон раҳбариятининг Қорақалпоғистон Республикасидаги вазиятни барқарорлаштиришга қаратилган қарорларини олқишлаймиз ва қўллаб-қувватлаймиз.
Ғоят муҳим сиёсий воқеа – Конституцияга ўзгартириш киритиш бўйича референдум арафасида қардош Ўзбекистонда тинчлик ва осойишталик қарор топишига ишончимиз комил.
Қозоғистон 1998 йил 31 октябрдаги “Абадий дўстлик тўғрисида”ги шартнома, 2013 йил 14 июндаги “Стратегик шериклик тўғрисида”ги шартнома ва 2021 йил 6 декабрдаги “Иттифоқчилик муносабатлари тўғрисида”ги декларация руҳида Ўзбекистон билан кўп тармоқли ҳамкорликни ривожлантириш ва мустаҳкамлаш аҳдида қатъий”, - дейилади расмий баёнотда.
