"Қимматга тушган тактик ғалаба"

 

4 июль куни Россия мудофаа вазири Сергей Шойгу Владимир Путинга Украинанинг Лисичанск эгалланганини ва ЛХР (Украина шарқидаги тан олинмаган ва ўз-ўзини мустақил деб эълон қилган тузилма) тўлиқ “озод қилинган”нини эълон қилди. Ғарбнинг айрим етакчи ҳарбий таҳлилчилари бу бўйича ўз фикрларини билдирди.

 

Улар Лисичанк ва Северодонецкнинг эгалланганини шубҳасиз, Россия армиясининг муваффақияти сифатида баҳоламоқда, аммо у катта куч ва воситаларни қурбон қилиш эвазига қўлга киритилган ғалаба эканини таъкидлашмоқда.

 

Нил Мелвин, Қироллик мудофаа тадқиқотлари бирлашган институти:

 

“Бу катта қурбонлар эвазига қўлга киритилган Россиянинг тактик ғалабаси. Бунга эришиш учун 60 кун сарфланди, бу жуда секин. Фикримча, руслар маълум ғалаба ҳақида гапиришади, аммо асосий жанг ҳали олдинда” (Reuters агентлиги интервьюси).

 

Роб Ли, АҚШ ташқи сиёсати бўйича тадқиқот институти етакчи илмий ходими:

 

“Путин буни муваффақият сифатида тақдим этиши мумкин. аммо умумий вазият нуқтайи назаридан бу Украинанинг яқин келажакда таслим бўлиши ёки бўйсунишини англатмайди (Reuters агентлиги интервьюси).

 

Майкл Кларк, Қироллик мудофаа тадқиқотлари бирлашган институти собиқ директори:

 

“РФ армияси муваффақиятга эришган бўлса-да, улар украиналиклардан кўра кўпроқ энергия сарфлади. Улар бунга жуда қиммат тўлашди” (Times газетасига интервьюсидан).

 

Филлипс о'Брайан, Сент-Эндрюс стратегик тадқиқотлар университети профессори:

 

“Украиналикларнинг мудофаа ҳаракатлари сабабли, руслар доимий равишда тўғридан-тўғри ҳужум қилишга мажбур бўлмоқда, улар олдиндан тайёрланган ва яхши таъминланган ҳимоячиларга дуч келмоқда. Айнан шу украиналиклар учун зарур”. (Ўз “Twitter” саҳифасида ёзган).