Россия ҳали жиддий уруш бошлагани йўқ. Ҳаммаси олдинда—Путин

 

Россия Президенти Владимир Путин унинг мамлакати Украинага қарши ҳали жиддий уруш бошламаганини айтди. Бу ҳақда “Корреспондент” нашри хабар бермоқда. 

 

“Ҳамма билиши керакки, биз умуман олганда, ҳали жиддий ҳеч нарса бошламадик. Шу билан бирга, биз тинчлик музокараларини ҳам рад этмаймиз. Лекин бу қанчалик узоқ давом этса, бизни рози қилиш шунчалик қийинроқ бўлади”, — деди Россия Президенти.

 

Путин Ғарбни Украинадаги урушни бошлаганликда айблади ва “жангда аллақачон мағлуб бўлганини” айтди.

 

“Улар бошиданоқ мағлубиятга учраганликларини тушунишлари керак эди, энди бу жараённи тўхтатиб бўлмайди”, — деди Путин.

Унинг сўзларига кўра, Ғарбнинг Россия Федерациясига қарши охиригача курашиш истаги Украина халқи учун фожиадир. Шунингдек, у Россия Федерациясига қарши санкциялар Ғарб умид қилаётган қийинчиликларни келтириб чиқармаслигини билдирган.