Навоийда 30 бошдан зиёд қўй номаълум ҳайвон томонидан бўғизлаб кетилганига расмий изоҳ берилди
Ҳодиса Хатирчи туманида 9 июль куни кечаси содир бўлган.
Ижтимоий тармоқларда Навоий вилоятининг Хатирчи туманида 30 бошдан ортиқ қўйни номаълум ҳайвон бўғизлаб кетгани ҳақида хабар тарқалди. Ҳолат юзасидан вилоят экология ва атроф-муҳитни муҳофаза қилиш бошқармаси расмий муносабат билдирди.
Жорий йилнинг 9 июлидан 10 июлига ўтар кечаси Хатирчи тумани “Янгирабод” МФЙда истиқомат қилувчи фуқароларга тегишли бўлган қўй-эчкиларга шоқол (чиябўри) томонидан ҳужум қилинган.
Мазкур ҳодисанинг келиб чиқиш сабаблари туман ИИБ, ветеренария, СЕОМ ва ободонлаштириш бўлими масъул ходимлари томонидан ўрганилмоқда. Айни пайтда 15 бош қўй-эчкиларга нисбатан даволаш ишлари олиб борилмоқда.
“Шу ўринда фуқароларга ортиқча ваҳима ҳамда хавотирга берилмасликларини таъкидлаб ўтамиз”, — дейилади хабарда.
Ҳозирда шоғал (чиябўри)ни тутиш учун барча таъсир чоралари кўрилган бўлиб, мазкур ҳолат юзасидан туман ИИБ ходимлари томонидан қўшимча суриштирув ишлари олиб борилмоқда.
