Нукусдаги митингда тинч аҳолига ўқ узилгани айтилди
Мазкур хабарларга Миллий гвардия расмий изоҳ берди.
Ижтимоий тармоқларда Нукусдаги тартибсизликлар вақтида ўқотар қуроллардан фойдаланилгани айтилган видеолавҳа тарқалди. Ҳолат юзасидан Миллий гвардия раддия билдириб, тарқалган хабарлар ҳақиқатга зид эканини маълум қилди.
Қайд этилишича, хорижий давлатларнинг бирида айрим ижтимоий тармоқлар орқали 1–2 июль кунлари Нукус шаҳрида бўлиб ўтган оммавий тартибсизликлар юзасидан турли хил ёлғон маълумотлар тарқатилиши давом этмоқда. Хусусан, тартибсизликлар содир бўлган жойларда фуқаролар томонидан ўқотар қуроллардан отилган гильзалар топилгани акс этган видеотасвирлар тарқатилган. Унда “тинч намойишлар чоғида, тинч аҳолини ўлдирган ўқ дорилардан қолган гильзалар” деган хабар тарқатилган. Бироқ бу видеотасвирда ҳеч қандай ўлганлар кўрсатилмаган.
Қўшимча қилинишича, Нукусдаги митинг вақтида фақат оломонни тарқатиш ва тартибсизликларни бостириш учун махсус воситалар – ёруғлик, шовқин ва тутун ишлатилган.
“Аниқлик киритиб ўтамизки, пиротехника воситалари билан тўлдирилган патронларнинг ўқлари махсус 4 ўқли қўшимчали Калашников автоматдан отилади. Албатта бундай махсус воситаларни қўллаш учун автоматга пахтовон ўқлар жойланади. Оламонни тарқатиш учун ишлатилган бу каби махсус воситалар қолдиқларини топиб олган айрим фуқаролар провокацион рухдаги видеохабарларни ижтимоий тармоқларда тарқатишни мақсад қилишган. Бироқ, ҳуқуқни муҳофаза қилувчи органлар ходимларининг бундай вазиятларда қуроллардан фойдаланиши учун қонуний асослари мавжуд”, — дейилади хабарда.
