Самарқанддаги Зарафшон дарёси ўзанида 4 гектар ер ёниб кетди
Ҳолат юзасидан суриштирув ишлари олиб борилмоқда.
Аввалроқ Самарқанд ва Пастдарғом туманларини бир-бирига боғловчи дарё ўзанида ёнғин чиққани ҳақида хабар берилган эди. Мазкур ҳолат юзасидан вилоят экология ва атроф-муҳитни муҳофаза қилиш бошқармаси ахборот хизмати муносабат билдирди.
Маълум бўлишича, жорий йилнинг 8 июль куни тушдан сўнг Қорадарёнинг Самарқанд тумани “Захлик” МФЙ ҳудудидан оқиб ўтувчи қирғоқ минтақасида ёввойи ҳолда ўсадиган юлғунзор номаълум шахслар томонидан ёқиб юборилган. Ҳолат туман ФВБ ёнғин-қутқарувчилари томонидан тезкор тартибда бартараф этилган. Ёнғин оқибатида ўрта 4 гектар ер майдонидаги бута ва юлғунлар ёнган.
Ҳозирда Самарқанд тумани Экология ва атроф-муҳитни муҳофаза қилиш бўлими ва тегишли мутасадди ташкилотлар томонидан ҳолат юзасидан қонунда белгиланган тартибда суриштирув ва ўрганиш ишлари олиб борилмоқда.
