АҚШ Хитойга қарши санкцияларни бир йилга узайтирди
Ушбу чекловлар Гонконг масаласи билан боғлиқ.
Жозеф Байден Хитойга қарши Гонконг масаласи билан боғлиқ санкциялар муддатини яна бир йилга узайтирди. Бу ҳақда Оқ уйнинг махсус баёноти эълон қилди.
Вашингтон Пекинни Гонконг мухториятини бостиришда айблаган ва бу хатти-ҳаракатларни АҚШ миллий хавфсизлиги, ташқи сиёсати ва иқтисодиётига хавф сифатида баҳолаган.
2020 йилда Хитой парламенти Гонконгда миллий хавфсизликни таъминлаш бўйича қонун қабул қилди. Расмий Пекин буни терроризм ва сепаратизм хавфи билан боғлаган.
2020 йилнинг 14 июль куни АҚШнинг ўша пайтдаги раҳбари Дональд Трамп ушбу масала ортидан ХХРга қарши санкциялар ва қўшимча савдо-иқтисодий божлар жорий қилди. Хитой томони буни ўз ички ишларига аралашув сифатида баҳолаган.
Аввалроқ Хитой ва АҚШ вакиллари глобал иқтисодий вазият юзасидан фикр алмашганди.
