Қибрайда 2 фуқаро 350 минг долларга ноқонуний ер сотмоқчи бўлди
Ҳозирда уларга нисбатан жиноят иши қўзғатилган.
Қибрай туманида 3 гектар ерни 350 000 АҚШ долларига сотмоқчи бўлган фирибгарлар ушланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Тошкент вилояти бошқармаси ДХХ ҳамда ИИВ ходимлари билан ҳамкорликда тезкор тадбир ўтказган. Унда фуқаро Ф. С. ва О. К.лар ўзаро тил бириктириб, Қибрай туманидаги 3 гектар ер майдонини фуқаро Г.га иссиқхона ташкил этиш учун танишлари орқали 350 000 АҚШ доллари эвазига расмийлаштириб беришни ваъда қилиб, шундан 10 000 АҚШ долларини олган вақтида ашёвий далиллар билан қўлга олинган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
