Украина ғалласини экспорт қилиш учун координацион марказ тузилади
Истанбулда бўлиб ўтган тўрт томонлама музокаралар тафсилотлари очиқланди.
Туркия мудофаа вазири Хулуси Акар Украина ғалласини экспорт қилиш бўйича тўрт томонлама музокаралар якуни бўйича маълумот берди.
“Ижобий ва конструктив руҳда ўтган музокараларда Истанбулда барча томонлар вакиллари иштирокида мувофиқлаштирувчи марказ тузиш, портлардан чиқишни биргаликда назорат қилиш ва кемаларнинг йўналиши каби техник масалаларда келишувларга эришилди”, – деган вазир.
Бундан ташқари, кейинги ҳафтада Туркияда якуний ҳужжатни имзолаш учун Россия ва Украина вакиллари учрашади. Акарнинг қўшимча қилишича, “дон коридорлари” тузиш иши БМТ билан координацияда амалга оширилади.
Антониу Гутерриш музокаралар якунига баҳо берар экан, унинг озиқ-овқат инқирозини ҳал этишда ўта муҳим эканлигини қайд этган. Шу билан бирга Москва ва Киев ўртасида тинчлик шартномаси имзоланишига ҳали вақт талаб этилиши таъкидланган.
Маълумот ўрнида: Украина ғалласини экспорт қилиш бўйича тўрт томонлама музокараларда Россия, Украина, Туркия ва БМТ вакиллари иштирок этган. Унинг навбатдаги формати 13 июль куни Истанбулда, ёпиқ форматда ўтказилди.
Аввалроқ Дмитрий Кулеба дон экспорти масаласини ҳал қилиш Москвага боғлиқлигини айтганди.
