Фарғонадаги нефт маҳсулотлари цехида ёнғин чиқди
Ҳодиса оқибатида 2 киши куйиш тан жароҳати олган.
Бугун, 14 июль куни Фарғона вилоятининг Тошлоқ туманида жойлашган нефтни қайта ишлаш цехида ёнғин содир бўлди. Бу ҳақда вилоят Фавқулодда вазиятлар бошқармаси Матбуот хизмати хабар бермоқда.
Ҳодиса соат 16:26 да Тошлоқ тумани “Ахшак” МФЙ Бешолиш даҳасида жойлашган нефт маҳсулотларини қайта ишлаш учун мўлжалланган цехда юз берган. Унда махсус қазилган 4х4 ўлчамли чуқурликдаги сиғими 200 литр бўлган 5 дона темир идишларда нефт маҳсулотларидан ёнғин келиб чиққан.
Мазкур цех Марғилон шаҳар Ал-Фаробий кўчасида яшовчи 1980 йилда туғилган А. И. га тегишли бўлган. Ёнғин оқибатида Тошлоқ тумани Ҳамза кўчасида яшовчи 1995 йилда туғилган фуқаро Ж. Т. I-II-III даражали 30 фоиз куйиш, Марғилон шаҳар “Надирмат” МФЙ Аминдарё кўчасида яшовчи 1987 йилда туғилган фуқаро Ф. Э. I-II-III даражали 80 фоиз куйиш тан жарохатлари билан вилоят РШЁИМга ётқизилган.
Ҳозирда ёнғиннинг келиб чиқиш сабаби ва зарари аниқланмоқда.
