Амалдор ногиронлар аравачасида шаҳар йўлларини текширди (видео)

 

Қозоғистонда маҳаллий амалдорнинг ногиронлар учун қурилган пандусларни текшириш давомида кутилмаган қийинчиликларга учради. Бу ҳақда Tengrinews.kz хабар берди.

 

Ҳодиса Талдиқўрғонда содир бўлган. AMANAT партиясининг маҳаллий филиали котиби Аманжол Жазикбаев йўл ва хусусий объектларда ногиронлиги бўлган шахслар учун яратилган шароитларни текширган. У ногиронлик аравачасида турли жойларда ҳаракатланган. Шаҳардаги дорихоналардан бирига киришда эса унинг аравачаси ағдарилиб кетган.

 

“Бошим ёрилишига оз қолди. Бу хусусий дорихона ёнида бўлди. Шаҳарда пандуслар билан муаммолар борлигини инкор қилмаймиз. Айрим жойларда улар умуман йўқ, бошқаларида нотўғри қурилган. Бу айниқса, хусусий секторда яққол кўринади. Айрим тадбиркорлар уни деярли 90 даража қияликда ўрнатган. Албатта, бу имконияти чекланган фуқароларимизнинг норозилигига сабаб бўлади”, – деган амалдор.

 

У жиддий жароҳатланмагани айтилмоқда. Жазикбаевнинг сўзларига кўра, мутасаддиларга керакли кўрсатма ва тавсиялар берилган. Улар тез орада бу муаммоларни бартараф этишга ваъда берган.