Тошкентда 49 ёшли эркак ўзини юқоридан ташлаб, жонига қасд қилмоқчи бўлди
Кейинчалик у бир кун аввал дўстлари билан спиртли ичимликлар истеъмол қилганини айтган.
10 июль куни Тошкент шаҳрининг Бектемир туманида номаълум эркак ўзини юқоридан ташлаб, жонига қасд қилмоқчи бўлди. Бу ҳақда вилояти ИИББ ахборот хизмати хабар қилди.
Қайд этилишича, эркак Бектемир тумани “Қўйлиқ” бозори ҳудудида жойлашган юқори кучланишли электр узатиш металл конструкциясининг юқорисига чиқиб, 32 метр баландликдан пастга сакраши билан таҳдид қилган.
Воқеа жойига биринчи бўлиб етиб келган ҳудудий профилактика инспектори катта лейтенант Улуғбек Абданбеков вазиятга тезда баҳо бериб, ўзини пастга ташламоқчи бўлган фуқаро билан мулоқотга киришади ва ўз ҳаётини хатарга қўйиб юқорига кўтарилади. Мавжуд хавф-хатарга қарамай, инспектор электр узатиш линиясининг устунига чиқишни давом эттиради ва фуқаронинг пастга тушишига ёрдам бериб, унинг ҳаётини сақлаб қолади.
Суриштирув давомида 49 ёшли Ғ. М. бир кун аввал дўстлари билан спиртли ичимликлар истеъмол қилиб, бозорга қандай ва нима учун келганини ҳамда электр устунга нима сабабдан чиқиб олганини эслай олмаслигини маълум қилган.
