Банк ходимлигидан Администрация раҳбарлигигача

 

16 июль куни Сардор Умрзоқов Президент Администрацияси раҳбари лавозимини эгаллади. У ўтган ҳафтада бошқа ишга ўтказилган Зайнилобиддин Низомиддинов ўрнини эгаллади. Қуйида Умрзоқовнинг ушбу лаваозимга қадар қайси ташкилотларда фаолият олиб боргани билан танишамиз.

 

1994 йилдан 1998 йилга қадар у Тошкент давлат иқтисодиёт университетида ўқиган. Шундан кейин бўлажак раҳбар Британиядаги Рединг университетида магистр даражасини олади.

 

Фаолиятини 2000 йилда Ўзбекистон Республикаси ташқи иқтисодий фаолият миллий банкида бошлаган. 2003 йилда ушбу банкнинг Самарқанд бошқармаси бошлиғи ўринбосари этиб тайинланади.

 

2004-2007 йилларда Умрзоқов Лондонда, Европа тараққиёт ва тикланиш банкида фаолият олиб боргани айтилади. У ҳозир ҳам шу банкнинг бошқарув кенгаши раиси ўринбосари ҳисобланади.

 

2007-2013 йилларда амалдор Ўзбекистон молия вазирлигининг турли тузилмаларида меҳнат қилган.

 

2014-2017 йилларда эса “Ўзчармпойабзали” Ассоциацияси раиси маслаҳатчиси, 2017-2018 йилларда шу ташкилот раҳбари ўринбосари бўлган. 2018 йилда у қайта ташкил этилган “Ўзчармсаноат” ассоциацияси раиси этиб тайинланади.

 

2019 йил 28 январь куни Умрзоқов ҳукумат таркибига киритилади. Ўша йили у Инвестициялар ва ташқи савдо вазири, 2020 йилда эса Бош вазир ўринбосари — Инвестициялар ва ташқи савдо вазири лавозимини эгаллайди.

 

Бундан ташқари, Президент Администрациясининг янги раҳбари Осиё инфратузилмавий инвестициялар банки бошқарувчиси, Ислом тараққиёт банки бошқарувчилари кенгаши раиси ҳам ҳисобланади.