Ўзбекистон Карaте миллий федерацияси мансабдорларига нисбатан жиноят иши қўзғатилди

Аввалроқ Ўзбекистон Карате миллий федерацияси президенти Н. Н. федерациянинг собиқ раҳбарлари хатти-ҳаракатларидан норози бўлиб, Коррупсияга қарши курашиш агентлигига мурожаат йўллаган эди. Шунингдек, ижтимоий тармоқларда ташкилот фаолияти билан боғлиқ коррупсион ҳолатлар кенг муҳокамаларга сабаб бўлган. 

Бош прокуратура ўтказган текширувлар натижасига кўра, Ўзбекистон Карате миллий федерацияси мансабдор шахслари ва бошқалар расмий ҳужжатларга сохта ёзув киритиб, жуда кўп миқдордаги бюджет маблағларини талон-торож қилганлиги маълум бўлди.  

Хусусан, 2020-2021-йилларда ўтказилган 10 та ўқув йиғинларида 49 нафар спортчи амалда қатнашмаган ҳамда меҳмонхона хизматидан фойдаланмаган бўлса-да, иштирок этганлиги ҳақида сохта ҳужжатлар расмийлаштирилиб, 403 млн сўмлик бюджет маблағлари ўзлаштириб юборилган. 

Спортчилар томонидан ишлатилмаган 64 турдаги 78,5  млн сўмлик дори воситалари ҳам талон-торож қилинган.  Шунингдек, спорт зал ижарага олинганлиги тўғрисида ҳужжатлар расмийлаштирилиб, 128 млн сўм маблағлар амалда спорт залига эга бўлмаган меҳмонхонага ўтказилиб, ўзлаштирилган. 

Шу каби 2021-йилда ўтказилган 3 та спорт мусобақалари қатнашувчилари томонидан тўланган 150 млн сўм бадал пуллари кирим қилинмаган.  Бундан ташқари, меъёрий ҳужжатлар талабаларига зид равишда карате бўйича жаҳон чемпиони Д. O.ga тренерлик қилмаган У. B.ga давлат бюджетидан асоссиз равишда 6 минг АҚШ доллари тўланишига эришилиб, бюджет маблағлари ўзлаштирилган.  

Юқоридаги ҳолатлар юзасидан Ўзбекистон Карате миллий федерацияси мансабдор шахслари ва бошқаларга нисбатан Ўзбекистон Республикаси Жиноят Кодексининг тегишли моддалари билан жиноят иши қўзғатилган.