Тошкентдаги кўп қаватли уйда ёнғин юз берди
ФВВ ҳолат бўйича маълумот берди.
Бугун, 18-июл куни Тошкент шаҳрининг Яккасарой туманидаги хонадонда ёнғин содир бўлди. Бу ҳақда Фавқулодда вазиятлар вазирлиги Матбуот хизмати хабар берди.
Маълум қилинишича, соат 14:41 да Яккасарой тумани “Бошлиқ” МФЙ Қушбеги кўчасида жойлашган кўп квартирали уйларнинг хонадонларидан бирида ёнғин содир бўлаётганлиги тўғрисида шаҳар ФВБга хабар келиб тушган.
Ёнғин-қутқарувчилар соат 14:50 да воқеа жойига етиб бориб, ёнғин соат 14:59 да ўчирилган. Ёнғинни бартараф этишга 2 та ёнғин-қутқарув экипажи ва 1 та автонарвон жалб қилинган.
Ҳодиса оқибатида хонадоннинг 10 квадрат метр майдонда уй жиҳозлари ёниб зарарланган. Олиб борилган тезкор ҳаракатлар туфайли ёнғиндан уйнинг 200 квадрат метр майдони сақлаб қолинган.
Ёнғиндан тан жароҳати олган ва ҳалок бўлганлар йўқ. Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.
