Россияга қарши санкцияларнинг еттинчи пакетидан нималар ўрин олган?
Чекловлар чоршанба куни қабул қилиниши кутилмоқда.
Евроиттифоқнинг Россияга қарши санкцияларнинг еттинчи пакети қайси соҳалар ва шахсларни қамраб олиши маълум бўлди. Бу ҳақда Reuters хабар берди.
Янги чекловлар остида Россиядаги “Тунги бўрилар” мотоклуби ва унинг раҳбарияти тушган. Хусусан, ушбу жамият президенти Александр Залдастанов ва унинг уч ўринбосарлари “қора рўйхат”дан ўрин олган.
“Сбербанк”ка қарши санкциялар хам кучайтирилган. Ғарб давлатларида унинг барча активлари бутунлай музлатилади. Бундан ташқари, банк бу ҳудудда молиявий операцияларнинг катта қисмини амалга ошира олмайди. Бу фақатгина озиқ-овқат ва қишлоқ хўжалиги минерал ўғитлари соҳасидаги амалиётларга нисбатан татбиқ этилмайди.
Умумий ҳисобда санкцияларнинг янги пакетига РФнинг 8 нафар юридик ва 47 нафар жисмоний шахслари ўрин олган. Улар орасида Москва мэри Сергей Собянин, актёрлар Сергей Безруков ва Владимир Машков, "Ростех" корпорацияси раҳбари Сергей Чемезовлар бор.
Reuters маълумотларига кўра, чекловлар чоршанба куни тасдиқланади.
Аввалроқ Венгрия Россияга қарши санкция жорий этишни тўхтатишга чақирганди.
