Самарқанд ва Сирдарёда ўқишга киритувчи фирибгарлар ушланди
Улар салкам 10 минг АҚШ доллари билан қўлга тушган.
Cамарқанд ва Сирдарё вилоятларида ўқишга киритиш ҳамда ўқишни кўчириб беришни ваъда қилган фирибгарлар ушланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментнинг Ургут туман бўлими томонидан ДХХ ва ИИБ ходимлари билан ҳамкорликда ўтказилган тезкор тадбирда фуқаро Д. В. бошқа бир фуқаро А. ни танишлари орқали Қозоғистон Республикасидаги университетлардан бирига тўғридан-тўғри 3-курсига ўқишга киритиб, кейинчалик ўқишини Ўзбекистонга кўчириб бериши эвазига 3500 АҚШ долларини олган вақтида ушланган.
Шунингдек, Д. В. фуқаро М. ни қўшни Тожикистон Республикасидаги университетга ўқишга киритиб, Ўзбекистонга кўчириб бериш эвазига 3000 АҚШ доллари олганлиги аниқланган.
Шу каби, Департамент ҳамда ДХХнинг Гулистон тумани бўлимлари томонидан ўтказилган тезкор тадбирда, фуқаро Ф. Г. бошқа бир фуқаро Р.ни танишлари орқали Украина Республикасидаги университетлардан бирида ўқиётганлиги ҳақида ҳужжат қилиб, ўқишини Гулистон Давлат университетига кўчириб бериш эвазига 3 200 АҚШ доллари сўраб, шундан 1 500 АҚШ долларини олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
