Давлат раҳбарлари саммити арафасида Марказий Осиё ТИВ раҳбарлари учрашди

 

2022 йил 20 июль куни Ўзбекистон Республикаси Ташқи ишлар вазири в.б. Владимир Норов Чўлпонота шаҳрида Марказий Осиё давлатлари ташқи ишлар вазирларининг йиғилишида иштирок этди.

 

Томонлар биринчи навбатда Марказий Осиё давлатлари раҳбарларининг бўлажак Маслаҳат учрашувига тайёргарлик масаласини кўриб чиққан. Саммит кун тартиби ва дастури, давлат раҳбарлари томонидан кўриб чиқиш учун тақдим этиладиган якуний ҳужжатлар лойиҳалари билан танишилган ва маъқулланган.

 

Марказий Осиёда сиёсат, савдо, инвестиция, саноат, транспорт, экология, энергетика, минтақавий хавфсизликни таъминлаш, замонавий хавф-хатар ва таҳдидларга биргаликда қарши курашиш соҳаларида давлатлараро ҳамкорликнинг бугунги ҳолати ҳамда истиқболлари юзасидан фикр алмашилди.

 

Владимир Норов ўз нутқида бугунги кунда Марказий Осиёда давлат раҳбарларининг сиёсий иродаси туфайли принципиал жиҳатдан янги дўстлик, ҳамкорлик ва ўзаро ишонч муҳити шаклланганини таъкидлади.

 

Шу билан бирга, замонавий воқеликларни ҳисобга олган ҳолда, Марказий Осиёда ҳамкорликни мустаҳкамлаш бўйича қатъий қадамлар қўйиш, юзага келаётган таҳдидларга ўз вақтида жавоб бериш ва оқибатларини юмшатиш бўйича тегишли ташаббус ҳамда янги ёндашувларни ишлаб чиқиш зарурлиги қайд этилди.

 

Хусусан, яқин савдо-иқтисодий ва инвестициявий сиёсат юритиш, тадбиркорлик субъектлари ва ҳудудлар ўртасида тўғридан-тўғри алоқаларни йўлга қўйиш, минтақанинг транспорт-транзит салоҳиятини ривожлантириш, табиий ресурсларни биргаликда самарали бошқариш муҳимлиги таъкидланди. Таъкидланганидек, бу йўналишларда қўшма чора-тадбирларнинг муваффақиятли амалга оширилиши бутун Марказий Осиё маконининг барқарор ривожланиши учун ҳар томонлама самара беради.

 

Афғонистондаги мавжуд вазиятга алоҳида эътибор қаратилди. Афғон халқига гуманитар ёрдам кўрсатишда ҳамкорликни давом эттириш долзарблиги таъкидланди.