Ўзбекистонда дизайн ва мода халқаро университети очилади
Бу бўйича Президент қарори лойиҳаси эълон қилинди.
Ўзбекистонда 2022/2023 ўқув йилидан бошлаб Тошкент дизайн ва мода халқаро университети очилади. Бу бўйича Президент қарори норматив-ҳуқуқий ҳужжатлар лойиҳалари муҳокамаси порталида эълон қилинди.
Қарорга кўра, Тошкент тўқимачилик ва енгил саноат институтининг “Енгил саноат буюмлари конструкциясини ишлаш ва технологияси (тикув буюмлари технологияси)”, “Дизайн” йўналишидаги бакалавриат таълим йўналишлари ва магистратура мутахассисликлари ҳамда Париж халқаро мода университети билан қўшма факултет негизида Тошкент дизайн ва мода халқаро университети (кейинги ўринларда – Университет) ташкил этилади.
Янги олийгоҳ республикада дизайн, тўқимачилик, ахборот технологиялари, тармоқлар иқтисодиёти, маркетинг ва бошқа талаб юқори бўлган таълим йўналишлари бўйича юқори малакали мутахассис сифатида асосан хотин-қизларни тайёрлаш ҳамда таълим сифатини яхшилаш, шунингдек, замонавий кадрларни тайёрлаш, қайта тайёрлаш ва малакасини ошириш тизимини такомиллаштириш, соҳага доир илғор хорижий тажрибаларни жорий этиш ва таълим жараёнини ишлаб чиқариш билан интеграсиясини жадаллаштириш мақсадида очилмоқда.
Университетда таълим жараёнлари Париж халқаро мода университети (Франция), Марказий Ланкшир университети (Буюк Британия), Корея политехника университети (Жанубий Корея), Европа дизайн институти (Италия) ва бошқа нуфузли хорижий олий таълим муассасалари билан халқаро стандартлар асосида олиб борилади.
