Араб давлатлари Европа нефть бозорида Россия ўрнини эгалламоқда
Етказиб бериш ҳажми ўтган йилга нисбатан икки баробарга кўпайган.
Саудия Арабистони ва Ироқ Европага нефть сотишни кўпайтирмоқда. Bloomberg маълумотларига кўра, бу ЕИнинг Россия энергетика ресурсларидан воз кечиши фонида рўй беряпти.
Хусусан, январга нисбатан етказиб бериш ҳажми 90 фоизга ошган. Бу кунига 2.2 миллион баррелни ташкил этяпти. Хусусан, Саудия Мисрга танкерлар орқали нефть олиб келади. У Sumed қувурига туширилади. У Қизил Денгиздаги Айн-Сохна терминали ва Ўртаер денгизидаги Сиди-Керир портини ўзаро боғлайди.
Бу ерда нефть яна танкерларга ортилади ва Европага жўнатилади. Июнь ойининг дастлабки уч ҳафтасида шу йўл орқали суткасига 1 миллион баррель “қора олтин” экспорт қилинган. Бу 2021 йилнинг шу даврига нисбатан 2 баробарга кўп.
Ироқ эса нефтни денгиз орқали етказиб бермоқда. Форс Кўрфазидан Сувайш каналига суткасига 1.2 миллион баррелгача нефть ортилган танкерлар қатнаяпти. Уларнинг катта қисми Ироқ ҳиссасига тўғри келган.
Аввалроқ Россия ва Эрон нефть-газ соҳасида 40 миллиард долларлик келишувга эришганди.
