Фарғонадаги чиқинди тўплаш жойида ёнғин юз берди
Оқибатда 200 квадрат метр майдонда ахлат уюми ёниб кетган.
Бугун, 24 июль куни Фарғона вилоятининг Қўштепа туманидаги чиқинди тўплаш ва қайта ишлаш жойида ёнғин юз берди. Бу ҳақда вилоят Фавқулодда вазиятлар бошқармаси матбуот хизмати хабар қилди.
Қайд этилишича, ҳодиса соат 12:05 да Қўштепа тумани “Хумдон” МФЙ Бахт кўчасида содир бўлган. Туманнинг “Кўприкбоши” МФЙ Булоқбоши кўчасида яшовчи якка тартибдаги тадбиркор С.Р. га қарашли ахлатни тўплаш ва қайта ишлаш жойида 200 квадрат метр майдонда ахлат уюми ёнган.
ФВБ ходимлари соат 12:17 да воқеа жойига етиб борган ва 12:22 да олов ўчирилган. Ҳудуднинг 300 квадрат метр майдони ёнғиндан сақлаб қолинган.
Ҳодиса оқибатида жабрланганлар йўқ. Ҳозирда ёнғиннинг сабаби ва зарари аниқланмоқда.
