АҚШ Украина донини олиб чиқишнинг муқобил йўлларини қидиришда давом этмоқда
Америка томони Москванинг ваъдаларига ишонмаяпти.
Вашингтон Украина ғалласини олиб чиқиш бўйича “Б режа”ни ишлаб чиқмоқда. Бу ҳақда АҚШ халқаро тараққиёт агентлиги (USAID) раҳбари Саманта Пауэр маълум қилди.
Унинг сўзларига кўра, Қўшма Штатлар Москванинг Истанбул келишувларида олган мажбуриятларини бажаришига ишонмаяпти. Дипломат “Б режа” ўз ичига ғаллани автомобиль ва темирйўл тармоқлари, шунингдек, дарё баржалари орқали олиб чиқишни назарда тутишини очиқлаган.
Маълумот ўрнида: 22 июль куни Истанбулда Украина донини Қора денгиз портлари орқали экспорт қилишни назарда тутувчи тўрт томонлама (Россия, Украина, Туркия ва БМТ) шартнома имзоланди. Унга кўра, Москва ғалланинг жаҳон бозорига денгиз маршрутлари орқали олиб чиқилишига тўсқинлик қилмаслик мажбуриятини олди.
Аммо шартнома имзоланганидан бир кун ўтиб Россия Одесса портига ракета зарбаларини берди. Москва Украина ҳарбий кемасига қарата ўт очилганини таъкидлаган.
