Хитой “Янги ипак йўли” лойиҳаси учун 2022 йилда энг кўп қайси давлатга сармоя киритган?
Асосий эътибор Яқин Шарққа қаратилгани айтилмоқда.
Хитой “Бир камар – бир йўл” лойиҳаси доирасида бу йил энг кўп Саудия Арабистонига инвестиция киритган. Бу ҳақда “Financial Times” хабар берди.
“Бир камар – бир йўл” ташаббуси 2013 йилда Хитой раҳбари Си Цзиньпин томонидан илгари сурилган. У кўп сонли давлатлар иштирокида халқаро савдо-инвестицион лойиҳаларни фаоллаштиришни назарда тутади. Ҳозирга қадар унга 150 давлат қўшилган.
Пекин лойиҳа доирасида 2022 йилда саудияликлар билан 5.5 миллиард долларлик келишувга эришган. 2021 йилда эса Ироқдаги инфратузилмавий лойиҳалар учун 10 миллиард доллардан ортиқ сармоя жалб қилинганди.
Эътиборлиси, глобал майдонда энг яқин ҳамкори бўлган Россияга Хитой ушбу дастур доирасида бу йил умуман инвестиция киритмаган. “Financial Times” 2022 йилда бу кўрсаткич нолга тушиб қолганини ёзган.
