Тошкентда иккита кўча бир ойга ёпилмоқда
Шаҳар ҳокимлиги чеклов сабабини маълум қилди.
Эртага, 28 июлдан бошлаб Тошкент шаҳрининг Чилонзор ва Сергели туманларида иккита кўча бир ойга ёпилади. Бу ҳақда шаҳар ҳокимлиги матбуот хизмати хабар берди.
Маълум қилинишича, йўл қурилиши ишлари олиб борилиши муносабати билан Чилонзор туманининг Чилонзор кўчаси Муқимий кўчаси билан кесишган жойидан Гагарин ҳайкалигача бўлган қисмида автомобиллар ҳаракати чекланади. Бу даврда ҳайдовчилар Чилонзор тумани Арнасой кўчасидан фойдаланишлари мумкин бўлади.
Шунингдек, йўл ва метро қурилиши ишлари олиб борилиши сабабли Сергели туманининг Дадахўжаев кўчаси Қурувчилар мавзесидан Хонобод кўчасигача бўлган қисмида автомобиллар ҳаракати тўхтатилади. Бу даврда ҳайдовчилар Сергели туманининг И. Якубов ва Белариқ кўчаларидан фойдаланишлари мумкин бўлади.
