Асакада биринчи Chevrolet Onix автомобили йиғилди
2023 йилдан мазкур турдаги транспорт воситалари оммавий ишлаб чиқарилади.
“UzAuto Motors” АЖ Асака заводида Chevrolet Onix автомобилини серияли ишлаб чиқарилишдан олдин, PPV PPV (Pre-Production Vehicle) босқичида биринчи Onix автомобили йиғилди. Бу ҳақда компания матбуот хизмати хабар берди.
Маълум қилинишича, 2023 йил бошида Chevrolet Onix автомобилининг оммавий ишлаб чиқарилиши бошланади.
Onix автомобилини 18 июлда ишлаб чиқарилиши бошланган Chevrolet Tracker каби GM GEM (General Motors Global Emerging Markets) платформасида ишлаб чиқариш йўлга қўйилади.
Эслатиб ўтамиз, бундан олдин “UzAuto Motors” Chevrolet Onix автомобилининг қачон ишлаб чиқарилиши тўғрисида маълумот берганди. Унга кўра, жорий йилнинг август ойида Chevrolet Onix ва Chevrolet Traker 2 автомобилларини ишлаб чиқаришни йўлга қўйиш учун Асакадаги заводда зарурий ишлар олиб борилган.
Chevrolet Onix автомобилининг биринчи партияси ишлаб чиқарилгандан сўнг олти ойлик синов муддатидан ўтиши керак. Автомобиллар турли хил иқлим шароитида, ҳар хил йўлларда синовдан ўтказилади. Onix автомобилларини серияли ишлаб чиқариш фақат тўлиқ тестдан ўтгандан кейингина бошланади.
