Х. Сулаймонова номидаги суд экспертиза маркази фаолияти ноқонунийми?
Депутат марказнинг ўз ваколатидан четга чиқиб, иш юритаётганини айтмоқда.
Адлия вазирлигига қарашли Х. Сулаймонова номидаги суд экспертиза маркази ваколатидан четга чиқиб, баҳолаш фаолияти билан шуғулланиб келаётгани айтилмоқда. Бу ҳақда Олий Мажлис Қонунчилик палатаси депутати Расул Кушербаев телеграм каналида хабар қилинди.
Депутатнинг ёзишича, суд экспертиза марказининг баҳолаш фаолиятини амалга ошириши қонун билан тақиқланган. Конституция, қонун ёки Олий Мажлис палаталарининг қарорида ушбу марказга баҳолашни амалга ошириш ҳуқуқи берилмаган.
Шунга қарамай, айрим фуқаролик ишлари бўйича судлар, ҳокимлик ва бошқа идоралар томонидан фуқароларнинг кўчмас мулкларини Адлия вазирлиги ҳузуридаги Х.Сулаймонова номидаги суд экспертиза маркази баҳолаши бўйича қарорлар қабул қилмоқда. Бу эса фуқароларда норозилик туғдиряпти.
“Энг қизиғи, баҳолаш ваколати йўқ эканлигини биладиган ушбу марказ ҳам уни рад этиш ўрнига ваколатидан четга чиқиб, баҳолаш фаолияти билан шуғулланиб келмоқда”, — дейди депутат.
“Баҳолаш фаолияти тўғрисида”ги қонуннинг 4-1-моддасига кўра, баҳоловчи ташкилот баҳолаш фаолиятини амалга ошириш ҳуқуқини берувчи лицензияга эга бўлган юридик шахсдир.
Агар қонун ҳужжатларида бошқача қоида белгиланмаган бўлса, давлат ҳокимияти ва бошқаруви органларининг баҳоловчи ташкилотни ташкил этиши, шунингдек баҳолаш фаолиятини амалга ошириши тақиқланади.
