Ҳар бир ҳудудда камида биттадан замонавий IT академия ташкил этилади
Президент бу бўйича ҳокимларга топшириқ берди.
Айни дамда Президентнинг IT соҳасида фаолият бошлаётган ёшлар билан учрашуви бўлиб ўтмоқда.
Бугун Президент Шавкат Мирзиёев Юқоричирчиқ туманидаги "Astrum" IT академиясига ташриф буюриб, ахборот технологиялари соҳаси мутахассислари, ёш дастурчилар, IT ва коммуникация компанияларининг раҳбарлари ва ходимлари билан учрашди.
Учрашувда IТ соҳасининг аҳамияти, яратилаётган шароитлар ва қилиниши керак бўлган ишлар ҳақида сўз бормоқда. Президент дунёда IТ хизматлари шиддат билан ривожланаётгани, жаҳонда бу соҳанинг ўсиш суръатлари йилига 10 фоизни ташкил этиб, жорий йилда 4,3 триллион долларга етганини таъкидлади.
“Биз ушбу бозорда мустаҳкам ўрин эгаллаш борасида катта ислоҳотларни бошладик. Соҳага сўнгги беш йилда 2 миллиард доллар, шундан 700 миллион доллар тўғридан-тўғри инвестициялар йўналтирилди", — дейди Мирзиёев.
Учрашувда вилоят ҳокимларига бир ой муддатда бу ерга келиб, барча шароит ва имкониятларни кўзи билан кўриб, ўз ҳудудида камида биттадан шундай IТ академия ташкил этиш лойиҳасини бошлашга топшириқ берилди.
